الامتحان الشفوي قرّب ومجاوبتش حلو في العملي

السلام عليكم ورحمة الله وبركاته

اخواني واخواتي في الله

مش عارفه اعمل ايه امتحاني الشفوي قرّب ومذاكرتش كوّيس وكمان اجابتي في العملي مش حلوه

انصحوني اعمل ايه ؟؟؟؟؟؟؟؟؟؟

بحاول اذاكر لكن كتير الدنيا بتاخدني وناسيه ان مصيري كله متوقّف على على اجابتي في العملي واللي من خلالها هيكون الشفوي بسيط وسهل ان شاء الله

على فكره انا عارفه اسئلة واجابات الامتحان الشفوي

صدوقني عارفاها

الممتحن قالهالي وارسل نائبه يقولهالي وبعتلي ناس كتير دايما بتفكرني بيهم
,لكن زي ما قلت مش هقدر اقولها غير لو استعديت كويس جدا وذاكرت وعملت كل اللي عليا
في
الامتحان العملي.........

لكن مش عارفه ليه مكسله ومش راضيه احفظ اجابات الشفوي وانا لسه في العملي وممكن اصلح اجاباتي لكن دايما بقول

كمان شويه

لسه بدري

هبقى اذاكر واصلح الاجابات لما الامتحان يقرب يخلص مع ان الورقه ممكن في اي لحظه تتسحب مني ووقتها عمري ما هينفع ارجعها او اصلح اي حاجه فيها تاني

من فضلكم ادعولي جزاكم الله خيرا

شكرا لكل اللي كان في نيته ينصحني او حتى يدعيلي عشان اجاوب كويس في الشفوي

لكن اسمحولي اوضّح لحضارتكم ايه هو العملي وايه الشفوي وايه الاسئله

العملي هو الدنيا لو ذاكرنا ديننا كويس وجاوبنا على قد ما نقدر اجابات عمليه توضح حبنا لله وللاسلام ولحبيبنا المصطفى صلى الله عليه وسلم

يبقى هنجاوب بسهوله ويسر ان شاء الله على الاسئله الشفوي واللي هيّ

من ربك؟؟؟؟؟؟؟؟؟؟؟

ما دينك؟؟؟؟؟؟؟؟؟؟؟؟؟؟

من نبيك؟/من هذا الرجل الذي بعث فيكم؟؟؟؟؟؟؟؟؟؟؟

والاجابات

ربي الله

وديني الاسلام

ونبيّ محمد عليه الصلاة والسلام

يارب يثبتنا جميعا عند الثلاث اسئله ونجاوب اجابه ترضي رب العالمين حتى يفسحلنا في قبورنا مد ابصارنا

اللهم آمين آمين آمين

ومين عارف امتحانه العملي هيخلص امتى عشان يقول كمان شويه او بكره هتوب ؟؟؟؟؟؟

ويا حسرة اللي ورقته اتسحبت منه قبل ما يذاكر ويصحح اخطاءه

لكن احنا لسه في الدنيا "العملي" وممكن نصلح اخطائنا ونتوب الشمس لسه مطلعتش من المغرب واحنا لسه لم نغرغر

الحمد لله على نعمة البقاء

يارب ردنا اليك مردا جميلا

ياللا يا اخواني واخواتي نعلنها توبه الى رب العالمين

يا نفس توبي فان الموت قد حانا ........... واعصي الهوى فالهوى مازال فتانا

أمــــــا ترين المنــايا كيف تلقـطنا ........... لقـطـــــاً و تلحـق أخرانـا بأولانا

في كـــــل يوم لنـا ميت نشــيعه ........... نــــرى بمصـرعه آثــــار موتــانـا

نسأل الله التثبيت عند السؤال

اللهم انا نستغفرك ونتوب اليك

اللهم انا نعوذ بك من كل كلمة حرام ومن كل نظرة حرام ومن كل خطوة حرام ونحمدك على كل نعمه انعمت بها علينا ونستغفرك على تجرأنا بها عليك سبحانك وتعاليت عما نفعل نشهد ان لا اله الا انت نستغفرك ونتوب اليك

منقول

موضوع فى غاية الروعه وفى طريقة العرض وهذا ليس بالجديد عليكى يادكتورة
فان كل مايحدث للانسان من امور حياتية متعلقة بالاخرة ويوم النتيجة الذى ينتظرة الكثيرين
ذوى الاعمال الصالحة
فعلا العملى والشفوى اساس للنظرى والذى ينوب عنة الملكين

جزاك الله خيرا يا دكتور على الرد
وربنا يكرمنا كلنا
في الدنيا عشان الكل يعرف
أن المسلمين ناجحين في كل حاجة
وده إن شاء الله يكون
سبيل للنجاة في الاخرة
ونسأل الله أن يرزق جميع المسلمين الفردوس الأعلى

جزاكي الله خيرا علي هذا الموضوع الرائع
وربنا يثبتنا عند السؤال
وفعلا مواضيعك كلها جميله يا دكتورة
الامتحان الشفوي قرّب ومجاوبتش حلو في العملي %20على%20الموضوع%20الرائع

الامتحان الشفوي قرّب ومجاوبتش حلو في العملي %20على%20الموضوع%20الرائع

جزانا و إياكم يا دكتور حسن
و بالنسبة للمواضيع منقولة
مش أنا اللي كاتباها

مش مهم انها منقوله
المهم ابتكارك في اختيار المواضيع و العناوين

جزاك الله خيرا يا دكتور
على الرد مرة تانية
وعلى ذوق حضرتك

الموضوع جميل ورائع
وبجد خوفنى
ويارب يوفقنا فىاننا نعمل من اجل النجاح فى الامتحان العملى
الذى على اساسه هيثبتنا فى الامتحان الشفوى

أمين يا رب العالمين
وربنا يوفقك يا قمر ويوفقنا
في الدنيا والآخرة

» امتحان الشرعي الشفوي تاني يوم النظري
» جدول العملي الاصدار الاخير
» 10 نصائح قبل الامتحان
» تغير فى جدول الامتحان
» عشرة نصائح من ا. عمرو خالد لايام الامتحان